مسلم لیگ (ن) کے سینئر رہنما اور سابق وزیر داخلہ رانا ثناء اللّٰہ نے کہا ہے کہ ایونٹ میں ریاست کا کوئی عمل دخل نہیں تھا۔
سب تک نیوز کے پروگرام نیا پاکستان میں گفتگو کے دوران رانا ثناء اللّٰہ نے کہا کہ جلسہ ہماری توقعات کے مطابق کامیاب رہا، پورے ملک سے لوگ بڑے بڑے قافلوں کی صورت میں پہنچے۔
انہوں نے کہا کہ ن لیگی جلسے میں ملک کے ہر حصے اور علاقے کی نمائندگی تھی، ہر شہر اور ہر قصبےسے لوگ شرکت کےلیے پہنچے، جلسہ گاہ میں گنجائش سے زیادہ لوگ موجود تھے۔
رانا ثناء اللّٰہ نے مزید کہا کہ کچھ لوگ دو، دو میل پیدل چل کر جلسہ گاہ پہنچے، ایونٹ میں ریاست کا کوئی عمل دخل نہیں تھا، موٹرسائیکل کسی نے مانگی ہے نہ کسی نے لی ہے۔
اُن کا کہنا تھا کہ جس تعداد میں لوگ آئے، ہم سب کو کھانا بھی نہیں دے سکتے، ملک کو بحران سے نکالنے کےلیے سب کو مل کر کام کرنا پڑے گا۔
ن لیگی رہنما نے یہ بھی کہا کہ سب میں پی ٹی آئی بھی شامل ہے، صرف 9 مئی کے جتھوں کو شامل نہیں کیا جاسکتا ہے۔
انہوں نے کہا کہ چیئرمین پی ٹی آئی کسی کے ساتھ بیٹھنے اور بات کرنے کو تیار نہیں، پونے 4 سال تک چیئرمین پی ٹی آئی نے جو کچھ کیا، وہ سب کے سامنے ہے۔
رانا ثناء اللّٰہ نے کہا کہ چیئرمین پی ٹی آئی کی جانب سےکوئی میسج ن لیگ سمیت کسی مخالف جماعت کو نہیں پہنچا۔
ان کا کہنا تھا کہ اگر میرے ذمے کوئی جرم ہے تو کیا مجھے اس لیے پراسیکیوٹ نہ کیا جائے کہ مجھے الیکشن لڑنا ہے؟ پی ٹی آئی کے کچھ لوگوں پر الزام ہے تو کیا پی ٹی آئی میں کوئی دوسرا نہیں؟
