ورلڈ کپ کے 32 ویں میچ میں جنوبی افریقہ نے نیوزی لینڈ کو 190رنز سے شکست دے دی ۔ جنوبی افریقہ نے پہلے بیٹنگ کرتے ہوئے مقررہ 50 اوورز میں 4 وکٹوں کے نقصان پر 357 رنز بنائے جس کے جواب میں نیوزی لینڈ کی پوری ٹیم167 رنز بنا کر ڈھیر ہو گئی.تفصیل کے مطابق بھارتی شہر پونے کے مہاراشٹر کرکٹ ایسوسی ایشن سٹیڈیم ہونیوالے میچ میں نیوزی لینڈ کے کپتان ٹیمبا باووما نے ٹاس جیت کر پہلے فیلڈنگ کا فیصلہ کیا، جنوبی افریقہ کے اوپنر بلے باز کپتان ٹمبا باووما 24 رنز بنا کر پویلین لوٹ گئے جبکہ کوئنٹن ڈی کوک اور راسی وین ڈیر ڈوسن نے ذمہ دارانہ بیٹنگ کا مظاہرہ کرتے ہوئے 200 رنز کی پارٹنر شپ قائم کی۔
جنوبی افریقہ کے ڈی کوک 3 چھکوں اور 10 چوکوں کی مدد سے 114 رنز بنا کر ٹم ساؤتھی کی گیند پر کیچ تھما بیٹھے جبکہ وین ڈیر ڈوسن 5 چھکوں اور 9 چوکوں کی مدد سے 133 رنز بنا کر ٹم ساؤتھی کی گیند پر بولڈ ہوگئے۔جنوبی افریقہ کی چوتھی وکٹ آخری اوور میں 351 کے مجموعی سکور پر گری جب ڈیوڈ میلر 53 رنز بنا کر جیمز نیشم کی گیند پر کیچ آؤٹ ہوگئے۔نیوزی لینڈ کی جانب سے ٹم ساؤتھی نے 2 جبکہ ٹرینٹ بولٹ اور جیمز نیشم نے ایک ایک وکٹ حاصل کی۔
مطلوبہ ہدف کے تعاقب میں نیوزی لینڈ کا کوئی بھی کھلاڑی خاطر خواہ کھیل پیش نہ کر سکا۔ اوپنرز ڈیون کانوے 2 اور ول ینگ 33سکور بنا کر آوٹ ہوئے۔ریچن رویندرا 9، ڈیرل مچل 24،ٹام لیتھم 4، مچل سینٹنر 7،ٹم سودی 7اور جیمز نیشم صفر پر آوٹ ہوئے۔جنوبی افریقہ کی جانب سے کیشیو مہاراج4 ، میکرو جینسن3اور گیرالڈ کوٹز 2کھلاڑیوں کو آوٹ کرنے میں کامیاب ہوئے۔
