سسٹر زیف کی ملاقات آپ پر فخر ترقی کا راز تعلیم : شہباز شریف

لاہور ( سب تکرپورٹ) سابق وزیراعظم اور مسلم لیگ (ن) کے صدر شہباز شریف سے سسٹر زیف نے ملاقات کی۔ شہباز شریف نے سسٹر زیف کو 2023ءکا گلوبل ٹیچر کا انعام جیتنے پر مبارک دی اور ان کے اہل خانہ کو خراج تحسین پیش کیا۔ شہباز شریف نے سسٹر زیف سے گفتگو کرتے ہوئے کہا کہ آپ نے پاکستان کا نام روشن کیا۔ پوری قوم کو آپ جیسی بیٹی پر فخر ہے۔ پاکستان کی ترقی کا راز تعلیم میں ہے۔ نوجوانوں کو تعلیم اور ہنر سے آراستہ کر کے ہی پاکستان کو ترقی سے ہمکنار کیا جا سکتا ہے۔ ملاقات میں سکول نہ جانے والے بچوں، فروغ تعلیم اور تدریس کے شعبے کی بہتری کے حوالے سے امور پر بھی تبادلہ خیال کیا گیا۔ سسٹر زیف نے شہباز شریف کی تعلیم اور ترقی کے لئے خدمات کو سراہا، انہوں نے کہا کہ آپ نے فروغ تعلیم کے لئے پنجاب انڈومنٹ فنڈ، دانش سکول، تعلیمی وظائف، ای بکس، آئی ٹی اور لیپ ٹاپ سکیمز کے ذریعے گراں قدر خدمات انجام دی ہیں۔ پاکستان کی سسٹر زیف کو 8 نومبر کو پیرس میں یونیسکو کی جنرل کانفرنس میں تقریب میں 2023ءکا گلوبل ٹیچر پرائز دیا گیا تھا۔