ملک کا وہ شہر جہاں روٹی کی قیمت 50 روپے مقرر کر دی گئی، بلوچستان کے دارالحکومت کوئٹہ میں روٹی کی نئی قیمتیں مقرر کیے جانے کے بعد تندور ایسوسی ایشن نے ہڑتال ختم کرنے کا اعلان کردیا۔ تفصیلات کے مطابق ڈپٹی کمشنر کوئٹہ اور تندور ایسوسی ایشن کے رہنمائوں کے درمیان روٹی کے وزن اور نرخوں کے حوالے سے مذاکرات کامیاب ہوگئے ۔ کامیاب مذاکرات کے بعد تندور ایسوسی ایشن نے ہڑتال ختم کرنے کا اعلان کرتے ہوئے کل سے شہر کے تمام تندور معمول کے مطابق کھولنے کی یقین دہانی کرا دی۔ بتایا گیا ہے کہ کوئٹہ میں 165 گرام وزنی پیڑے سے تیار ہونے والی روٹی کا ریٹ 25 روپے اور 330 گرام وزنی پیڑے سے تیار ہونے والی روٹی کا نرخ 50 روپے مقرر کرنے پر اتفاق ہوا ہے۔ دوسری جانب ملک کے کئی علاقوں میں آٹے کی قیمت میں بھی اضافہ کر دیا گیا۔دس کلو چکی کے آٹے کے تھیلے کی قیمت 1350روپے سے بڑھ کر 1470 ہو گئی ہے۔ چکی مالکان کے مطابق سو کلو گندم کی بوری تین ہزار روپے مہنگی کر دی گئی ہے، پہلے قیمت 8500 روپے تھی جو اب بڑھ کر 11500 کر دی گئی ہے۔ چکی مالکان کا کہنا تھا کہ سو کلو گندم اوپن مارکیٹ میں 12000 روپے میں فروخت ہو رہی ہے۔ جبکہ پنجاب میں بھی پنجاب کے کئی شہروں میں آٹے کی قیمت کو پھر سے پر لگ گئے ہیں۔ چند ہی دنوں میں آٹے کے تھیلے میں 300 روپے تک اضافہ ہوا ہے۔ یوں پنجاب کے کئی شہروں میں 10 کلو آٹے کا تھیلا 1500 روپے کا ہو گیا جبکہ 20 کلو آٹھے کا تھیلا 3 ہزار روپے کا ہو گیا۔ کئی شہروں میں آٹے کا 20 کلو کا تھیلا 3 ہزار روپے سے بھی زائد قیمت پر فروخت ہو رہا ہے۔ واضح رہے کہ چند روز قبل ہی آٹے کی قیمت میں 100 فیصد سے زائد اضافے کی منظوری دی گئی تھی۔ پنجاب حکومت نے آٹے کی سرکاری قیمت میں ہوشربا اضافہ کر دیا ہے۔ کابینہ کمیٹی کی منظوری کے بعد محکمہ خوراک پنجاب نے گندم اور آٹے کے ریٹ مقرر کر دیئے۔ محکمہ خوراک پنجاب کی جانب سے گندم اور آٹے کے ریٹ مقرر کرنے کا نوٹیفکیشن بھی جاری کیا جا چکا۔ نوٹیفکیشن کے مطابق فی کلو آٹے کی قیمتوں میں 75 روپے کا ہوشربا اضافہ کر دیا گیا جس کے بعد فی کلو آٹے کی قیمت 65 روپے سے بڑھا کر 140 روپے تک پہنچ گئی ہے۔ گندم کا فی من ریٹ 4700 روپے مقرر کیا گیا ہے جبکہ 10 کلو آٹے کے تھیلے کا ایکس مل ریٹ 1374 روپے مقرر کیا گیا ہے تاہم 10 کلو آٹے کے تھیلے کا پرچون ریٹ 1399 روپے مقرر ہوا ہے۔ بتایا گیا ہے کہ 2022 میں گندم کا فی من ریٹ 2300 روپے تھا جبکہ 10 کلو آٹے کا تھیلا ایکس مل ریٹ پر655 روپے میں دستیاب تھا، اسی طرح 2022 میں 10 کلو آٹے کا تھیلا پرچون میں 650 روپے میں فروخت ہوتا تھا جبکہ فی کلو آٹا 65 روپے میں ملتا تھا۔
ملک کا وہ شہر جہاں روٹی کی قیمت 50 روپے مقرر کر دی گئی
