عالمی معیشت بہتر ہونے کے باوجود مطلوبہ سطح سے کم ہے، سعودی وزیر خزانہ

ریاض (شاہدنعیم) سعودی وزیر خزانہ محمد عبداللہ الجدعان نے کہا ہے کہ عالمی سطح پر معیشت میں نمایاں بہتری آنے کے باوجود گراف مطلوبہ سطح سے کم ہے۔ معیشت کی بہتری اورعالمی چیلنجز سے نمنٹے کے لیے ضروری ہے کہ کثیر الجہتی تعاون کی اہمیت کو مدنظر رکھتے ہوئے کام کیا جائے۔ وزیر خزانہ الجدعان برازیل کے شہر ریوڈی جنیرو میں منعقد ہونے والے جی 20کے وزراء خزانہ اور مرکزی بینک کے گورنرز کے تیسرے اجلاس سے خطاب کررہے تھے جس میں انکے ہمراہ سعودی عرب کے مرکزی بینک کے گورنر ایمن بن محمد السیاری بھی موجود تھے۔وزیر خزانہ نے بین الاقوامی ٹیکس تعاون کے ایجنڈے کی حمایت کے لیے مملکت کی جانب سے کی جانے والی کوششوں کی جانب توجہ مبذول کرائی ۔ انہوں نے موسمیاتی اور پائیدار ترقی کے اہداف کے حصول کے لیے ہونے والے سیشن میں واضح کیا کہ اس حوالے سے پائیدار سرمایہ کاری کے لیے مربوط و منظم کارروائی کی ضرورت ہے۔ الجدعان نے کم آمدنی والے ممالک میں قرضوں سے خلاصی کی اہمیت کو اجاگر کیا جس کی وجہ سے ان ممالک کو پریشانی کا سامنا کرنا ہوتا ہے۔ اجلاس کے موقع پر سعودی وزیر خزانہ الجدعان نے جی 20 وزراء کے ساتھ ملاقاتیں کیں جن میں انہوں نے بین لاقوامی مالیاتی امور کے حوالے سے باہمی دلچسپی کے امور پر تبادلہ خیال کیا۔