سینیٹر فیصل واوڈا نے کہا ہے کہ مراد سعید آگئے تو فیض حمید، بانی پی ٹی آئی کو کوئی بندہ نہیں بچا سکتا۔
سب تک نیوز کے پروگرام کیپٹل ٹاک میں فیصل واوڈا اور پی ٹی آئی کے سردار لطیف کھوسہ نے شرکت کی اور ایک دوسرے کو چیلنج دے دیا۔
فیصل واوڈا نے دعویٰ کیا کہ بانی پی ٹی آئی رہا نہیں ہوں گے، تحریک انصاف کا کوئی ایم پی اے 50 بندے بھی لے آیا تو اُسے کیپٹل ٹاک میں آکر سلام پیش کریں گے۔
انہوں نے کہا کہ میں حکومت کا اتحادی نہیں ہوں مجھ پر اتنا برا وقت نہیں آیا، کوئی کہے کہ میں حکومت کا اتحادی ہوں تو طنز لگتا ہے۔
سینیٹر فیصل واوڈا نے مزید کہا کہ امریکا اور برطانیہ سے بھی خطوط آگئے ہوا کچھ نہیں، بانی پی ٹی آئی کے اردگرد لوگ وہی کررہےہیں جو میں کہتا رہا ہوں۔
ان کا کہنا تھا کہ تحریک انصاف میں اس وقت 6 سے 8 دھڑے ہیں، میں نے پہلے کہا کہ اہلیہ آجائیں گی پھر ان کی مخالف بہنیں آجائیں گی۔ اپنی بات پر کھڑا رہتا ہوں وزیروں کی طرح ڈونلڈ ٹرمپ کے خلاف بیان ڈیلیٹ نہیں کرتا۔
انہوں نے کہا کہ 24 نومبر کو بانی پی ٹی آئی کی کوئی رہائی نہیں ہوگی، آج جس کیس میں بانی پی ٹی آئی بری ہوئے وہ میری وجہ سے ہوئے۔
سینیٹر فیصل واوڈا نے کہا کہ 9 مئی کے کچھ لوگ مسنگ ہیں ان کو اس دھرنے میں ڈھونڈا جائے گا، مراد سعید آگئے تو فیض حمید اور بانی پی ٹی آئی کو کوئی بندہ نہیں بچا سکتا۔
ان کا کہنا تھا کہ یہ دھرنا بھی لوگوں کو مروانے کے لیے کیا جارہا ہے پہلے کی طرح فلاپ شو ہوگا، اسٹیبلشمنٹ کےلیے یہ لاسٹ یا سیکنڈ لاسٹ کال نہیں یہ شغل میلا ہے۔
فیصل واوڈا نے کہا کہ یہ نالائق اور نکمی حکومت ہی ہوسکتی ہے جو ایسے کیسز بناتی ہے، ن لیگ کی شیلف لائف ختم ہوچکی ہے، پنجاب میں بھی حالت ٹھیک نہیں۔
