بالی ووڈ کے سینئر اداکار گووند نامدیو نے اداکارہ شیوانگی ورما کے ساتھ ڈیٹنگ کی افواہوں پر خاموشی توڑ دی۔
بھارتی میڈیا کے مطابق گووند نامدیو کی عمر 70 جبکہ شیوانگی ورما کی عمر 31 سال ہے۔
گووند نامدیو بالی ووڈ سُپر اسٹار سلمان خان کی بلاک بسٹر فلم ’وانٹڈ‘ سمیت سیکڑوں فلموں میں کام کر چکے ہیں۔
بھارتی میڈیا کے مطابق گووند نامدیو کے حوالے سے کئی دنوں سے سوشل میڈیا پر افواہیں زیرِ گردش تھیں کہ ان کے اور اداکارہ کے درمیان افیئر چل رہا ہے۔
میڈیا رپورٹس کے مطابق اداکارہ شیوانگی ورما نے کچھ دن پہلے اپنے سوشل میڈیا اکاؤنٹ پر گووند نامدیو کے ساتھ تصویر شیئر کر کے لکھا تھا کہ ’پیار کی کوئی عمر اور کوئی حد نہیں ہوتی‘۔
اس پوسٹ کے بعد ان دونوں اداکاروں کے درمیان افیئر کی افواہوں کا سلسلہ شروع ہو گیا تھا۔
اب ان افواہوں پر سینئر اداکار کی جانب سے وضاحت دے دی گئی ہے۔
گووند نامدیو نے سوشل میڈیا پر بیان جاری کیا ہے کہ یہ صرف افواہیں ہیں، وائرل ہونے والی تصویر آنے والے پروجیکٹ سے متعلق ہے جس کا میری ذاتی زندگی سے کوئی تعلق نہیں۔
انہوں نے کہا کہ اندور میں ایک فلم کی شوٹنگ چل رہی ہے جس میں ہم دونوں ساتھ کام کر رہے ہیں، یہ اسی فلم کا حصہ ہے۔
سینئر اداکار کا کہنا ہے کہ فلم کی کہانی کچھ ایسی ہے کہ جس میں ایک معمر شخص کو ایک نوجوان اداکارہ سے پیار ہو جاتا ہے۔
بھارتی میڈیا کے مطابق گووند نامدیو کا بیان سامنے آنے کے بعد اب ان سے متعلق افواہوں کے سلسلے کو بریک لگ گیا ہے۔
