محکمہ انسداد دہشتگردی (سی ٹی ڈی) پولیس اسلام آباد نے سال 2024 میں متعدد اہم کامیابیاں حاصل کیں جس کی تفصیلات بھی جاری کردی گئیں۔
ترجمان اسلام آباد نے سال 2024 میں سی ٹی ڈی اسلام آباد کی کارکردگی کے بارے میں کہا کہ سی ٹی ڈی اسلام آباد نے اس سال ضلع بھر میں 141 سرچ آپریشنز کیے۔
ترجمان کے مطابق سرچ آپریشنز کے دوران 9 ہزار 378 گھروں، 12 ہزار 427 مشکوک افراد اور 4 ہزار 966 مشکوک موٹر سائیکل چیک کیے۔
انہوں نے بتایا کہ سرچ آپریشنز کے دوران بغیر کاغذات 201 موٹر سائیکل اور 17 گاڑیاں تھانوں میں بند کیں۔ سرچ آپریشنز کے دوران مختلف بور کے 219 اسلحہ، 1593 راؤنڈ اور 139 میگزین برآمد کیں۔
ترجمان کے مطابق سرچ آپریشنز کے دوران 202 بوتلیں شراب، 3 کلو 865 گرام ہیروئن، 3200 گرام چرس اور 710 گرام آئس برآمد کی۔
ترجمان کے مطابق سال 2024 میں دیگر قانون نافذ کرنے والے اداروں کے ساتھ 52 انٹیلیجنس بیسڈ آپریشنز کیے۔ انٹیلیجنس بیسڈ آپریشنز کے دوران 46 مشکوک افراد کو گرفتار کیا گیا۔
انٹیلیجنس بیسڈ آپریشنز کے دوران 1480 گرام دھماکا خیز پاوڈر، 10 ڈیٹو نیٹرز، 11 فٹ سیفٹی فیوز تار، 2 پرائما کارڈ، 8 گرنیڈ، ایک مائن اسپیس بھی برآمد کی۔
آپریشنز میں ایک آئی ای ڈی، 5 پسٹلز، 1 کلاشنکوف اور دھماکے میں استعمال ہونے والا دیگر مواد بھی برآمد کیا۔
سی ٹی ڈی اسلام آباد نے غیرقانونی طور پر رہنے والے 92 غیر ملکیوں کو ان کے ملک روانہ کیا اور اسلام آباد میں رہائش پذیر 12 ہزار 400 سے زائد افغانیوں کا ریکارڈ مرتب کیا۔
