اسکاٹش جونیئر اوپن اسکواش ٹورنامنٹ میں پاکستانی کھلاڑیوں نے شاندار کارکردگی کا مظاہرہ کرتے ہوئے چار مختلف کیٹیگریز میں ٹائٹلز اپنے نام کرلیے۔ تین دیگر ایج کیٹیگریز میں پاکستانی پلیئرز نے تیسری پوزیشنز حاصل کی۔
ایڈنبرا میں ہونیوالے ایونٹ میں پاکستان نے بوائز انڈر 13، بوائز انڈر 15، بوائز انڈر 17 اور گرلز انڈر 13 کیٹیگریز میں کامیابی حاصل کی۔
بوائز انڈر 13 کے فائنل میں پاکستان کے سہیل عدنان نے اسپین کے ایٹزل ریگیورو گارشیا کو 0-3 سے شکست دے کر ٹائٹل جیتا۔ بوائز انڈر 15 کے فائنل میں حذیفہ شاہد نے سنگاپور کے ریحان سنگھ کے خلاف سخت مقابلے کے بعد 2-3 سے کامیابی حاصل کی۔
بوائز انڈر 17 میں پاکستان کے اذان خان نے سوئٹزرلینڈ کے لینڈرو ووگیل کو مات دے کر گولڈ میڈل جیتا جبکہ گرلز انڈر 13 کیٹیگری میں ماہ نور علی نے بھارت کی دیوانشی جین کو شکست دے کر ٹائٹل اپنے نام کیا۔
دیگر کیٹیگریز میں بھی پاکستانی کھلاڑیوں نے نمایاں کارکردگی دکھائی۔ بوائز انڈر 13 میں سخی خان ترین جبکہ گرلز انڈر 15 میں سحرش علی اور گرلز انڈر 17 میں مہوش علی نے تیسری پوزیشن حاصل کی۔
