وفاقی وزیرِ اطلاعات عطاء اللّٰہ تارڑ کا کہنا ہے کہ 190 ملین پاﺅنڈ کے فیصلے کو عالمی میڈیا نے کرپشنز کی ہیڈ لائنز دیں۔
190 ملین پاﺅنڈ میگا کرپشن کیس پر گفتگو کرتے ہوئے انہوں نے کہا کہ اس کیس کے ٹھوس شواہد موجود تھے، میاں بیوی نے رشوت میں 200 کنال زمین لی۔
عطاء اللّٰہ تارڑ کا کہنا ہے کہ ٹرسٹ بنایا گیا، انگوٹھیاں لی گئیں، اس سے بڑی کرپشن کی کوئی مثال نہیں، بند لفافہ کابینہ اجلاس میں لایا گیا۔
وزیرِ اطلاعات نے کہا کہ سپریم کورٹ نے بھی کہا کہ پیسہ ایک ہاتھ سے لے کر دوسرے ہاتھ دے دیا گیا، حکومت پاکستان کے پیسے کا غلط استعمال کیا گیا، عوام کے اربوں روپے بٹورے گئے۔
ان کا کہنا ہے کہ جو پیسہ ضبط کیا گیا تھا وہ حکومت پاکستان کی ملکیت تھا، پی ٹی آئی والے اب اس معاملے کو سیرت سے جوڑ رہے ہیں۔
وفاقی وزیر نے کہا کہ مذہب کو سیاست سے باہر رکھیں، اپنی کرپشن اور رشوت کا جواب دیں، مذہب کے پیچھے چھپ کر اپنے گھناﺅنے جرم چھپانے کی کوشش مت کریں۔
