پاکستانی امن فوجیوں کی پیشہ ورانہ مہارت کا بھارتی فورس کمانڈر کی جانب سے اعتراف کیا گیا، یہ اعتراف آرمی چیف جنرل سید عاصم منیر کو ایک خط کی صورت میں کیا گیا ہے۔
پاک فوج کے شعبہ تعلقات عامہ آئی ایس پی آر کے مطابق پاکستانی امن دستے جنوبی سوڈان میں اقوام متحدہ کی سلامتی کونسل کی طرف سے تفویض کردہ مینڈیٹ کے مطابق امن و سلامتی کے قیام کیلئے فرائض انجام دے رہے ہیں۔
آئی ایس پی آر کے مطابق خط میں بھارتی جنرل آفیسر نے پاکستانی امن فوجیوں کی پیشہ وارانہ مہارت، لگن اور غیرمتزلزل عزم کو سراہا۔ بھارتی جنرل آفیسر نے بریگیڈیئر شفقت اقبال کے بطور سیکٹر کمانڈر کرادار کو سراہا۔
آئی ایس پی آر کے مطابق بھارتی جنرل آفیسر نے لیفٹیننٹ کرنل شہباز اسلم کے بطور کمانڈنگ آفیسر کردار کو بھی خصوصی طور پر سراہا۔
آئی ایس پی آر کے مطابق پاکستان اقوام متحدہ کے امن مشن میں بین الاقوامی برادری کے ایک ذمہ دار رکن کی حیثیت سے اہم کردار ادا کرنے کیلئے پرعزم ہے۔ پاکستانی بلیوہیلمٹ نے شہریوں کے تحفظ کو یقینی بنانے کیلئے پیچیدہ اور چیلنجنگ آپریشنل ماحول میں مشکل کام کیے۔
شہریوں کا تحفظ پاکستانی امن دستوں کےلیے ہمیشہ اولین ترجیح رہی ہے، پاکستانی دستے نے دن رات کام کیا اور سیلاب سے متاثرہ علاقوں میں ڈھائی لاکھ سے زیادہ بے گھر افراد کی حفاظت کی۔
آئی ایس پی آر کے مطابق پاکستان کی خواتین امن دستوں کا ان کی پیشہ ورانہ مہارت کا اعتراف کیا گیا، دو پاکستانی پیس کیپرز میجر ثانیہ صفدر اور میجر کومل مسعود کو صنفی وکالت کے ایوارڈ سے نوازا گیا۔
آئی ایس پی آر کے مطابق یو این جنرل ہیڈکوارٹر کے انڈر سیکرٹری جنرل، ڈپارٹمنٹ آف پیس آپریشنز نے پیس کیپرز خواتین کو ایوارڈ سے نوازا