مسلم لیگ ن کے قائد و سابق وزیر اعظم نواز شریف کے استقبال کے لیے قافلے روانگی کے لیے تیار ہیں۔
صوبہ پنجاب کے شہر راولپنڈی سے 70 بسوں پر مشتمل قافلہ لاہور مینار پاکستان پہنچے گا۔
قافلے کی قیادت مسلم لیگ ن کے رہنما حنیف عباسی اور چوہدری تنویر کریں گے۔
روانگی سے قبل مختلف حلقوں میں کارکنوں کے لیے لذیذ ناشتے کا بھی اہتمام کیا گیا۔
حلوہ پوری، چنے، آلو بجیا، حلیم اور گرم نان سے کارکنان کی تواضع کی گئی۔
نواز شریف کے استقبال کے لیے قافلے آئی جے پی روڈ پر اکٹھے ہوں گے، آئی جے پی روڈ سے براستہ 22 نمبر چونگی موٹروے سے قافلے لاہور روانہ ہوں گے۔
کارکنان کی ٹرانسپورٹ کی لیے بسیں مختلف حلقوں میں پہنچا دی گئی ہیں۔
لودھراں سے بھی قافلہ روانہ
نوازشریف کے استقبال کے لیے مسلم لیگ ن کا لودھراں سے بھی قافلہ لاہور کے لیے روانہ ہو گیا ہے۔
مسلم لیگ ن کے سابق اراکین صوبائی و قومی اسمبلی قافلے میں شامل ہیں۔
قافلے کی لاہور کے لیے روانگی سے قبل شرکاء کے لیے دنیاپور میں چنے نان اور حلوہ پوری کا اہتمام کیا گیا۔
