لیاری یونیورسٹی کی طالبہ کی شکایت پر ڈپٹی ڈائریکٹر فنانس کے خلاف تحقیقاتی کمیٹی تشکیل

کراچی (اسٹاف رپورٹر) بے نظیر بھٹو شہید یونیورسٹی لیاری کی طالبہ کا ڈپٹی ڈائریکٹر فنانس کے خلاف ہراسانی کی شکایت درج کرنے پر انتظامیہ نے نوٹس لیتے ہوئے تحقیقاتی کمیٹی تشکیل دے دی۔ اس معاملے پر 2اکتوبر دوپہر 12بجے کمیٹی روم، وی سی سیکرٹریٹ میں ایک اجلاس بھی منعقد کیا جائے گا میٹنگ میں ڈپٹی ڈائریکٹر فنانس کی موجودگی لازمی قرار دی گئی ہے، خط کے مطابق تحقیقات کے لیے یہ ضروری ہے کہ کمیٹی شکایت کے منصفانہ اور مکمل جائزہ کو یقینی بنائے جس کے لیے تمام ملوث فریقوں کی بات سنی جائے گی اس بنیاد پر فیصلہ کیا جائے گا۔ بی بی اے کی طالبہ نے الزام عائد کیا تھا کہ ڈپٹی ڈائریکٹر فنانس مجھ سے نازیبا گفتگو کرتے ہیں۔طلبہ کا کہنا ہے کہ ڈپٹی ڈائریکٹر فنانس نے میرے منگیتر سے متعلق بھی غیر اخلاقی گفتگو کی جس کی تحریری شکایت کر دی ہے۔اس حوالے سے رجسٹرار وسیم مرزا کا کہنا ہے کہ واقعے کی تحقیقات کریں گے، کوئی ملوث ہوا تو کارروائی کریں گے۔