جو کہتے تھے سیاست ختم ہو گئی دیکھ لیں نوازشریف آن بان شان کیساتھ اپنے لوگوں میں آ گئے: مریم نواز

لاہور (نیوز رپورٹر+ سب تکرپورٹ) پاکستان مسلم لیگ (ن) کی چیف آرگنائزر مریم نواز جلسہ گاہ میں نواز شریف کی تصویر والی شرٹ پہن کر شریک ہوئیں۔ مریم نواز کا کہنا تھا کہ وتعز من تشاءوتذل من تشائ۔ لاہور مینار پاکستان میں مسلم لیگ (ن) کے جلسے سے خطاب کرتے ہوئے مریم نواز نے کہا کہ نواز شریف آج ایک بار پھر آپ کے درمیان موجود ہیں۔ نواز شریف آن بان اور شان کے ساتھ اپنے لوگوں میں واپس آگئے ہیں۔ مینار پاکستان کا میدان نواز شریف کے شیروں کیلئے چھوٹا پڑ گیا ہے۔ رہنما مسلم لیگ (ن) نے کہا کہ آپ کو مینار پاکستان میں خوش آمدید کہتے ہیں۔ یہاں پنجاب‘ سندھ‘ خیبر پی کے‘ گلگت بلتستان‘ آزاد کشمیر اور بلوچستان بھی ہے۔ پاکستان یہاں پر موجود ہے۔ مریم نواز نے کہا کہ آج تقریر صرف نواز شریف کریں گے۔ میں تقریر نہیں کروں گی۔ یہاں پر 10 فیصد لوگ موجود ہیں۔ باقی لوگ سڑکوں پر ہیں۔ نواز شریف کو مٹانے والے کتنے آئے اور کتنے چلے گئے۔ جو کہتے تھے نواز شریف کی سیاست ختم ہو گئی۔ وہ دیکھیں آج نواز شریف واپس آرہے ہیں۔ رہنما مسلم لیگ (ن) نے کہا کہ نواز شریف اللہ کے فضل سے اپنے گھر‘ اپنی مٹی‘ اپنے وطن واپس آئے ہیں۔ مریم نواز کے ساتھ حمزہ شہباز بھی سٹیج پر موجود تھے۔ اس موقع پر مریم نواز نے کہا کہ جوکہتے تھے ن سے ش نکلے گی‘ دیکھیں ن اور ش ساتھ ہیں۔ ن اور ش ایک ہیں۔ ماشاءاللہ۔ اللہ دونوں بھائیوں اور بہن بھائیوں کی جوڑی سلامت رکھے۔