آرمی چیف جنرل عاصم منیر نے کہا ہے کہ معاشرے میں مایوسی پیدا کرنے کی ناکام کوشش کرنے والوں کو شکست ہوئی ہے۔
پاک فوج کے شعبہ تعلقات عامہ آئی ایس پی آر کے مطابق آرمی چیف جنرل عاصم منیر نے کراچی کور کے تحت آنے والے علاقے کا دورہ کیا۔
اس موقع پر آرمی چیف کو آپریشنل تیاریوں اور فوج کی جانب سے اہم تربیتی اقدامات پر بریفنگ دی گئی۔ آرمی چیف نے انووسٹا انڈس آئی ٹی پارک کا افتتاح بھی کیا۔
آئی ایس پی آر کے مطابق آرمی چیف نے کراچی کی کاروباری برادری سے گفتگو کی اور ملک کی معاشی ترقی میں تاجروں اور سرمایہ کاروں کی خدمات کو سراہا۔ کاروباری برادری نے مثبت معاشی اشاریوں کے حصول میں ایس آئی ایف سی کے کردار پر اظہار اعتماد کیا۔
آئی ایس پی آر کے مطابق آرمی چیف نے تمام اقدامات کی حمایت پر وفاقی اور صوبائی حکومتوں کی کوششوں کی تعریف کی۔
آرمی چیف نے کہا کہ معاشرے میں مایوسی پیدا کرنے کی ناکام کوشش کرنے والوں کو شکست ہوئی ہے۔ تمام اسٹیک ہولڈرز کی اجتماعی کوششوں سے مایوسی پیدا کرنے والوں کو شکست ہوئی ہے۔
آئی ایس پی آر کے مطابق آرمی چیف نے پاکستان کی اقتصادی بحالی میں مدد پر چین، سعودی عرب اور یو اے ای کے کردار کو سراہا۔ برادر اور دوست ممالک کے متعدد شعبوں میں مدد کرنے پر ان کے کردار کی تعریف کی۔
آئی ایس پی آر کے مطابق آرمی چیف نے کہا کہ چین، سعودی عرب اور یو اے ای کی جانب سے متعدد شعبوں میں مدد فراہم کی گئی۔
آئی ایس پی آر کے مطابق آرمی چیف نے کہا کہ پاکستان مختلف شعبوں میں قابل ذکر صلاحیت رکھتا ہے۔ سب کو پاکستان کے روشن مستقبل پر غیر متزلزل اعتماد ہونا چاہیے، بے پناہ وسائل اور صلاحیت کے پیش نظر پاکستان اقوام عالم میں اپنا صحیح مقام حاصل کرے گا۔ پاکستان کا مقدر ہے کہ وہ اقوام عالم میں اپنا صحیح مقام حاصل کرے۔ انشاء اللّٰہ۔
آئی ایس پی آر کے مطابق آرمی چیف نے کہا کہ آئی ٹی پارک کا مقصد نوجوانوں کو آئی ٹی اور آرٹیفیشل انٹیلیجنس میں تعاون کو فروغ دے کر بااختیار بنانا ہے۔
افتتاحی تقریب میں وزیر اعلیٰ سندھ مراد علی شاہ اور سول کمیونٹی کے افراد نے شرکت کی۔
آئی ایس پی آر کے مطابق آرمی چیف نے کہا کہ ایسے منصوبوں کا مقصد آئی ٹی انڈسٹری کی ترقی کو مزید فروغ دینے کےلیے سازگار ماحول فراہم کرنا ہے۔
دریں اثنا اس موقع پر وزیر اعلیٰ سندھ نے نوجوانوں کی صلاحیتوں سے فائدہ اٹھانے اور معاشی ترقی کےلیے آئی ٹی ڈومین کی اہمیت پر زور دیا۔
