شائستہ لودھی نے اداکاراؤں کی نائٹ پارٹیز کا بھانڈا پھوڑ دیا

—فائل فوٹو 

پاکستان کی معروف اداکارہ میزبان شائستہ لودھی نے پاکستانی اداکاراؤں کے نائٹ پارٹیز میں جانے اور صبح طے شدہ شو میں نہ پہنچنے سے متعلق انکشاف کیا ہے۔

جیو انٹرٹینمنٹ کے ڈرامہ سیریل ’خان‘ میں ثروت کا کردار ادا کرنے والی معروف اداکارہ شائستہ لودھی نے حال ہی میں ایک نجی ٹی وی کے مارننگ شو میں شرکت کی۔

اس دوران انہوں نے بطور میزبان پیش آنے والی مشکلات سے متعلق کھل کر بات کی۔

بیوٹی کاسمیٹکس سرجن ڈاکٹر شائسہ لودھی نے میزبان ندا یاسر کی جانب سے پوچھے گئے سوال کے جواب میں انکشاف کیا کہ اکثر انہوں نے ایسے حالات کا بھی سامنا کیا کہ شو کے پروڈیوسر اُنہیں شو کے دوران آگاہ کرتے تھے کہ آج کے پروگرام کے لیے جن اداکارہ کو بلایا تھا وہ نہیں آ رہیں، سارا شو آپ نے خود سنبھالنا ہے۔

اس پر ندا یاسر نے سوال دہرایا کہ کیا ایسا ہوا ہے کبھی؟ جس پر شائستہ لودھی کا کہنا تھا کہ بہت بار ایسا ہوا ہے کہ پروڈیوسر بتاتے ہیں کہ اداکارہ کے گھر کے باہر گاڑی کھڑی ہے مگر اداکارہ اُٹھ نہیں رہی ہیں۔

اس پر ندا یاسر نے سوال کیا کہ پھر کیا ہوا ؟

اس پر شائستہ نے اپنی بات جاری رکھتے ہوئے مزید بتایا کہ اداکارائیں یہ وجہ بتاتی ہیں کہ رات میں انہوں نے دوستوں کے ساتھ جو پارٹی کی تھی، وہ رات بھر جاگ رہی تھیں اُس کے بعد اُن کی حالت ایسی نہیں ہے کہ وہ صبح شو میں شرکت کریں یا ٹی وی پر آئیں۔

شائستہ لودھی کا مزید کہنا تھا کہ ایسے میں آپ سوچتے ہیں کہ اچھا وہ شو پر نہیں آ سکتیں، اب آپ کو کسی بھی مہمان کے بغیر اپنا شو بھی چلانا ہے، کیوں کہ پروگرام خالی تو جا نہیں سکتا اب آپ نے جو بولنا ہے یا کہنا ہے دیکھ بھال کر شو مکمل کرنا ہے۔

اداکارہ کا مزید کہنا تھا کہ اس طرح کے اکثر تجربات ہوتے ہیں جس پر آپ کچھ نہیں کر سکتے۔

اپنا تبصرہ بھیجیں